Associazione Veneti nel Mondo onlus

SAN MARCO

Santo patrono de la asociasión Veneti nel Mondo Onlus

Inte i libri del Nóvo Testamento Marco el xe ricordà pa diexe volte, co'l nome ebraico de Giovanni, co'l nome romàn de Marco o co'l dopio nome di Giovanni Marco.
El xera fiolo de chela Maria che la gaveva la caxa indove se catava i primi cristiani de Jeruxalème e indove xe ndà a catar protesion S. Pietro dopo la prodijoxa libarasión da la galera.
Marco, ebreo de orìjine, pare che'l sìpia nasésto fóra de la Palestina, da na fameja che stava ben.
S. Pietro, che el lo ciama "fiolo mio", se lo gà portà insieme de sicuro inte i só viaji misionari in Oriente e a Roma, indove el gavarìa scrito el Vanjelo.
La antichità cristiana, scumisiando da Papia (130), la gà ciamà Marco "interprete de Pietro": "Marco, on interprete de Pietro, el gà metésto par iscrìto propio tuto quelo che'l se ricordava. Parò el gà scrito quelo che dal Signor xa stà dito o fato, no drio l'órdene. Marco cioè no'l ga mia scoltà Signor e gnanca lo gà conpagnà; ma dopo el gà scoltà Pietro, che el contava i so insegnaminti drio el bexogno... ".

Oltre a la famejarità co S. Pietro, el evanjelista Marco el pol dir de aver visudo par on tocoin comunità co el apostolo Paolo, che'l ga catà pa la prima 'olta inte'l 44, co Paolo e Barnaba i gà portà a Jerixaleme la coléta tirà sù da la comunità de Antiochia.
Co i xe tornà indrìo, Barnaba el se gà porta drio co lu Marco, xóvane nevodo.
Na volta evanjelixà Candia (Cipro), co Paolo el gà inbastìo sù el projeto de viajo pì difìsile e ris-cióxo inte'l core de l'Axia Minore, in mexo a le cative popolasion semibàrbare del Tauro, Marco - se pol lèxare inte i Ati de i Apostoli - "el se gà cavà via da Paolo e Barnaba e el xe tornà indrìo a Jeruxaleme".
Pì vanti Marco el xe tonrà in parte de S. Paolo fin che sto qua el xera prexoniero a Roma.
Inte'l 66 S. Paolo el ne dà la ùltima informasión so Marco, scrivendo da la prexon romana a Timoteo: "Porta co ti Marco. Pòso ben aver bexogno de i tó servìsi".

Pare propio che el sia morto inte l'àno 140 de l'inpero di Nerone (68), cofà martire, a Alesandria d'Ejìto.
I Ati de Marco, on scrìto de la metà del quarto secolo, i ne dixe che S. Marco el 24 de april el xe stà strasinà da i pagani pa le vie de Alesandria, ligà co corde al colo.
Butà in galera, el dì dopo el gà pasà el stéso tratamento incredibile el xe morto.
El so corpo, bruxà, el xe stà portà via dai fedeli parché ghe xera el ris-cio che le vegnése desfà.
Dó mercanti venesiani i gà portà via i so resti inte'l 828 e dal 976 al 1071 xe stà mésa in pie la stupenda baxilica a Venesia dedicà a l'autor del secondo Vanjelo, el Santo che come sinbolo el gaveva el leon.